He Arotake: A Message for Nasty Nā: Hannah Tunnicliffe

Ko ngā pukapuka katoa ka hokona mā tēnei hononga ka āwhina i a mātou ki te arotake i ētahi atu pukapuka nō Aotearoa - ngā mihi ki a koe mōu i tautoko i ngā pukapuka me ngā kaituhi o Aotearoa

He hoa aroha i wehea e te pakanga nui! I ora noa ahakoa ngā uauatanga! He kōrero mō te māia me te manawanui! He kōrero ēnei ka kitea i ngā kiriata nui engari ki a Roderick Fry, he kōrero tika tēnei mō tōna ake whānau.

Ko A Message for Nasty te tuhinga taki a Fry mō ōna tūpuna, mō Vincent rāua ko Marie Broom i te wā o te Pakanga Tuarua o te Ao. I tūtaki a Vincent, he kaipūkaha mō te tauā moana o Aotearoa, ā, he tangata aroha nui, he ringa rehe hoki, ki a Marie, he wahine nō Makau e mōhiotia ana mō tana kōrero hāngai me tana huatau, ahakoa i taumautia a Marie ki tētahi atu nā tana pāpā i whiriwhiri. Kāore a Marie i whakaae ki tērā - 18 ōna tau ka moe rāua ko Vincent, ā, ka hūnuku ki Hong Kong.

Tekau tau i muri mai kua rite mō te pakarutanga mai o te riri i Te Moana-nui-a-Kiwa, me te whakaeke a ngā Hapanihi i runga o Hong Kong, me te kino hoki o aua mahi. Ko te raruraru kē, i taua wā, i te Tīhema, 1941, i Hong Kong a Marie me ana tamariki tokowhā, ā, i Hingapoa a Vincent e mahi ana. Nā, ka noho wehe, ka mutu neke atu i te rua tau rāua e nganga ana kia piritahi anō, ā, ko ā rāua mahi i taua wā he haere toropuku, he mate taumaha, he tuhinga toropuku, he mahi huna, te manawanui me ngā tohutohu a tētahi matakite.

Nā te kino o ngā āhuatanga i roto i A Message for Nasty ka noho mōrearea te whānau. Hei tauira, me pupuri a Marie i te rongoā mate eku mō ana tamariki, kāore e kore ka hiahia rātou i te rongoā ā tōna wā, me hoko atu rānei hei hoko kai mā ana tamariki e matekai ana? He kiripuaki mīharo a Vincent rāua ko Marie, ā, ko tētahi o ngā painga o te pukapuka ka haeretahi ā rāua kōrero.

He wahine māia tonu a Marie - ko tōna āhua Hainamana tētahi painga mōna, ā, he manawa kai tūtae ia, ā, ahakoa tērā ka mātua whakarite kei te ātaahua tonu. Ka mea atu tētahi ki a ia: ‘Maringi noa mai te kupu i ō ngutu.’ Ka haere ia ki te whare hauora, ā, ko te kōrero whakatūpato a Tākuta Selwyn-Clarke ki a Marie, kia manawanui ia, arā: ‘We have to prepare for the worst. You have to manage your affairs as if this is going to go on for years.’ Me takatū koe mō ngā kino katoa. Me āta whakarite koe i ō take katoa i te mea ka hia nei tau pea te roa o tēnei.'

He weriweri ngā whakamārama o ngā mōreareatanga ki ngā wahine i Hong Kong, he whenua kua nōhia e ngā Hapanihi, ā, mā ana hononga, tana mōhio me tana atamai i ora ai a Marie. Ki te whakaaro hōhonu ake, ka akiaki a A Message for Nasty i te kaipānui kia whai whakaaro ki ngā pūnaha me ngā painga o te papapori, te iwi, te ira me te hononga o tētahi ki tētahi, te pānga hoki o tētahi ki tētahi i ngā wā mōrearea.

Ahakoa he nui ngā kōrero pārekareka o tēnā whānau, o tēnā whānau e pai ana hei tuhi ki te pukapuka, ehara i te mea he pūkōrero tō ia whānau e mōhio ana ki te whakatakoto kōrero me te rangahau e oti ai he pukapuka. Waimarie ngā Brooms i a Roderick Fry i te mea kei a ia aua pūkenga e toru. Kāore e kore he uaua rawa te tuhi i te pakiwaitara A Message for Nasty. He āmiki rawa ngā kōrero hītōria, ā, kua ngaro noa atu ngā taunakitanga me ngā maharatanga o ngā kōrerorero o mua.

He rawe te mahi a Fry ki te whakarite i te tika o ngā hītoria me te tuku i tētahi kōrero whakaihiihi. Ka pārekareka ki ētahi kaipānui ngā āpitihanga hītōria me ngā mapi kei te muri o te pukapuka, ā, mēnā kāore aua kōrero i te pai ki ētahi, hei aha. Mōku ake, e hiahia ana te kite i tētahi putanga pakimaero o tēnei kōrero mā te hunga taiohi kia kite ai rātou i tētahi atu tirohanga ki te Pakanga Tuarua o Te Ao.

Ka hāngai tēnei pukapuka ki te kaipānui e pai ana ki ngā hītōria mō ngā pakanga me ngā tuhinga pono, otirā ki te kaipānui e hiahia ana ki ngā kōrero mātātoa. Ka kīia pea kei roto i tēnei pukapuka ngā painga katoa: he kōrero whaiāipo, he pakanga kino, me te kōrero mātātoa e mau tonu ai te aroha, ahakoa te pakanga.

Nā Hannah Tunnicliffe

Tirohia ētahi atu kōrero